Vegur 574, Útnesvegur, liggur um þjóðgarðinn og er aðkoma bæði að sunnan og norðan. Vegurinn er að hluta til malarvegur en ætlunin er að búið verði að leggja bundið slitlag á hann haustið 2008. Frá Reykjavík eru rúmir 200 km að þjóðgarðsmörkum. Yfir sumarið eru daglegar áætlunarferðir á milli Reykjavíkur og Hellisands/Ólafsvíkur. Einnig er í boðið uppá hringferð fyrir jökul. Trex.is
Starfsmenn þjóðgarðsins aðstoða gesti og veita þeim upplýsingar um þjóðgarðinn og nágrenni hans. Þeir bjóða upp á skipulagðar göngu- og fræðsluferðir og eru gestir hvattir til að kynna sér þær og taka þátt í þeim.
Á Hellnum er gestastofa þjóðgarðsins. Þar er skemmtilegur og margvíslegur fróðleikur um svæðið, bæði náttúru og mannlíf.
Tjaldsvæði eru ekki innan þjóðgarðsins en í nágrenni hans eru tjaldsvæði og úrval gististaða. Veitingastaðir eru í nágrenninu. Sundlaugar eru í Ólafsvík, á Lýsuhóli, í Grundarfirði og Stykkishólmi. Næstu matvöruverslanir eru á Hellissandi, Rifi og Ólafsvík. Bensínafgreiðslur eru á sömu stöðum og einnig á Arnarstapa og Vegamótum.
Öllum er frjálst að ganga um land þjóðgarðsins en ætlast er til að merktum gönguleiðum sé fylgt þar sem þær eru fyrir hendi. Akstur er leyfður á akvegum og merktum slóðum og hjólreiðar einnig. Hestaumferð er heimil á merktum reiðleiðum. Þeir sem hyggjast fara með hesta um þjóðgarðinn eru beðnir um að hafa áður samband við starfsmenn hans.
Göngum vel um náttúruna og vinnum ekki spjöll á henni svo sem með því að aka utan vega, rífa upp gróður, raska jarðmyndunum eða trufla dýralíf. Gætum þess að gróður er oft þurr og kveikjum hvorki eld á víðavangi né setjum einnota grill á gróið svæði. Tökum allt sorp með okkur. Hundar eru velkomnir í þjóðgarðinn en höfum þá í ól og þrífum eftir þá úrgang.
